الشبهة السادسة ((يا عم انتوا بتقولوا ايه بس ده المنقبات دول ( والملتحين بالمرة ) اسوء ناس اصلا))

السلام عليكم ورحمة الله وبركاته

الشبهة السادسة

وعذراً علي تأخرها

وجزي الله اختنا كاتبتها خير الجزاء

وأترككم مع الشبهة

((يا عم انتوا بتقولوا ايه بس ده المنقبات دول ( والملتحين بالمرة ) اسوء ناس اصلا))

ومعاملاتهم اسوء معاملة !!!

طب انا عندي سؤال هو حضرتك اتعاملت مع كام واحدة منتقبة وكام واحد ملتحي ؟

- لا يعني محبش اتعامل معاهم اصلا .

يعني حضرتك ما اتعملتش معاهم اصلا او لو اتعاملت مع واحد اتنين تــلاتة حتى وتقول انهم اسوء ناس ؟ ده على اي اساس ؟

طيب حيث كده بقى انا اقدر اقول ان المصريين دول كلهم ....

بلاش علشان منغلطش في حد

بس هي دي الحقيقة انا لو همشي بمنطلق واحد عمل موقف وحش يبقى كل اللي زيه مش كويسين يبقى خلاص بقى بكل بساطة الناس كلها وحشة

لان ببساطة برده الناس كلها مش ملائكة

امال عاملين فيها ملتزمين ليه بقى والنقاب اد كده واللحية اد كده

يا سَيدي الفاضل البشر كلللهم مفيش حد فيهم ملاك

ان كان المنتقبة او الملتحي بيحاولوا يقربوا لربنا بأي عبادة ومن ضمنها النقاب او اللحية .. فده في حد ذاته شيء كويس

هو النقاب او اللحية دول حاجة سهلة يا جماعة؟

تفتكروا المنتقبة دي مثلا مش بيبقى نفسها انها تروح تتغدى في اي مطعم ( وان كان في منتقبات بتروح عادي بس بنقول مثلا )

مش بتبقى حرانة جدااا في الصيف ؟

مش تضحية يا جماعة ولا ايه ؟

الملتحي ايام النظام البائد مش كان ممكن يتاخد من الشارع في اي وقت بتهمة انه ملتحي ؟!!!

هي دي مش تضحية؟

نقوم احنا بقى سايبين ده كله ونيجي نمسك في اصله يا سيدي كان معايا في الشغل وزعق فيا او كان مكشر

طب ما طبيعي .. لانه بشر بيفرح ويحزن

لا هو ملاك ولا هو آلة علشان تفضل شايفه مبتسم 25 ساعة في الـ 24 ساعة

ولا ايه ؟

وبعدين برده يا جماعة الناس اللي بتبني رأيها على ( بيقولوا )

أصلهم بيقولوا ان الملتزمين دول معاملاتهم وحشة

يا سيدي جرب تتعامل معاهم وبعدين احكم ولو حصل وواحد ضايقك اكيد مش كللللهم وحشين

وبعدين نيجي لحتة بيقولوا

هما مين دول يا جماعة اللي بيقولوا

مش نسأل نفسنا ليه في ناس عايزة تكرهنا في الملتزمين ؟

ليه عايزين يبينوا ان الملتزمين دول ارهابيين ؟

ما
طبيعي جدااا انهم يقولوا كده علشان ما تقربش منهم و(متتعديش منهم ) ربنا
يهدينا جميعاً .. وتسيب بقى مسلسلاتهم وافلامهم والبنات تلبس حجاب والشباب
يروح الجامع وتبقى هيصة بقى

حاجة اخيرررررة بس عايزة اقولها قبل ما نقفل الشبهة دي

يا جماعة مينفعش نقول كل ملتحي نصاب او كل ملتحي مش عارفة ايه

ما ننساش يا جماعة ان الرسول ( صلى الله عليه وسلم ) كان ملتحي

اخشى ان حد فينا يقول الجملة دي او يسئ الظن بكل الملتحين فتكون عملت عمل عظيم يُغضب الله

فلنحسن الظن يا جماعة بالناس ونبطل أسلوب التعميم

طب بس استني رايحة فين انا عندي كمان شبهة

خيييييير ؟

(( في ناس بتستخدم النقاب ده في اعمال وحشة فاحنا كده بنشبه نفسنا !!!))

طيب دي هتكون شبهتنا الجاية إن شاء الله

واللي بعدها هتكون ...

(( دي المنتقبة دي ارهابية ومتشددة ))

إن شاء الله

وبكده هتكون الشبهات اللي عندنا انتهت إن شاء الله

لو حد في شبهة بتقابله ياريت يقولنا عليها